قال محمود عبد العاطي دونجا، لاعب بيراميدز الحالي والزمالك السابق، إنه مفيش فريق محظوظ أو كعبه عالٍ على فريق آخر في كرة القدم، فيه فريق موفق وآخر غير موفق، وأكد أن مباريات بيراميدز مع الزمالك والأهلي نتائجها غير متوقعة لأنهم فريقان كبار، وفي المواجهات دي مفيش فريق فائز أو متوقع للنتيجة قبل البداية، اللي يجتهد ويقاتل أكتر هو اللي هيفوز.
وأضاف “دونجا” في تصريحات لبرنامج نجوم دوري نايل مع أحمد المصري عبر إذاعة أون سبورت إف إم، إنهم خسروا نهائي كأس مصر أمام الزمالك لأنهم ماكانوش مستعدين 100%، واللاعبين ماكانوش متحمسين زي ما كانوا في نهائي دوري أبطال إفريقيا قبلها بأيام، وبالتالي من الطبيعي تخسر لأنك بتواجه فريق كبير زي الزمالك وجماهيره العظيمة اللي تقدر تحرك الصخر وتعمل أي حاجة في أي وقت.
وتحدث لاعب الزمالك السابق عن كابتن سيد عيد، مدرب كبير وبيقدم موسم رائع مع بتروجيت، وكابتن محمد الشيخ مع وادي دجلة، هو صديق شخصي ومدرب ممتاز عنده طموحات كبيرة، وبيحب المدربين اللي يجتهدوا وما يسيبوش فرصة للتطور إلا وينتهزوها، وأبرزهم علي ماهر مع سيراميكا كليوباترا، وده واضح في المباريات مع المدربين دول، الأفكار والتكتيكات والجهود كلها بتظهر بوضوح في الملعب، هو أفضل مدرب في مصر حاليًا وبيقدم موسم متميز مع فريقه.
واستكمل لاعب بيراميدز الحالي، إن ده اللي لازم يحصل لو عايزين نطور الكرة المصرية، إننا نعتمد على مدربين مؤهلين تمامًا، لكن لما تبص على مدربي منتخبات الناشئين في مصر هتلاقي العكس تمامًا، ولو بصيت لدولة زي المغرب، هتلاقي المنتخب الأول رابع العالم ومنتخب الناشئين بطل العالم بمدربين وطنيين مؤهلين وحاصلين على شهادات معتمدة، كل الفئات العمرية بتتنافس في البطولات القارية والعالمية بقوة، والموضوع مش شخصي زي ما بيحصل هنا، لكن دي سياسة بيطبقها اتحاد اللعبة نفسه.
واختتم محمود عبد العاطي دونجا حديثه، إن ده توجه الدولة بالكامل، وبالتالي محتاجين اهتمام أكبر من الدولة بالرياضة لأن اسم مصر مش صغير، منتخب مصر الثاني خرج بفضيحة كروية من كأس العرب 2025 بقطر، لازم نتعلم من أخطائنا ونعيد رسم سياسات الرياضة عشان نقدر نستعيد مكانتنا كأفضل منتخب في إفريقيا مرة تانية.
التعليقات