ـ أتوقع أن الأهلي وبيراميدز يوصلوا لنصف نهائي أفريقيا على الأقل، وأشوف أن الأحمر هيحقق لقب الدوري.

ـ مش معايا تصريحات حسام حسن، والمباريات الودية مش معيار لتقييم المنتخب.

ـ الأهلي تطور بشكل كبير مع توروب، وعنده هجوم قوي.

ـ الأهلي محتاج رأس حربة وباك لفت ومساك في يناير.

ـ محمد شريف مش قادر يعوض غياب وسام أبو علي.

حرص نجم الأهلي السابق على إبداء رأيه في أداء الفريق تحت قيادة الدنماركي توروب، وتأثيره على أداء نادي القرن الأفريقي، وكمان تقييمه للصفقات اللي اتعملت الصيف اللي فات، واحتياجات النادي من صفقات في يناير الجاي.

كمان أحمد بلال اتكلم عن رأيه في أداء منتخب مصر تحت قيادة حسام حسن في الفترة الأخيرة، والتصريحات اللي قالها بعد مباراة كاب فيردي الودية، وشكل المنافسة في الدوري المصري وأفريقيا هذا الموسم.

ـ إيه تقييمك لأداء الأهلي مع توروب وهل قادر على تحقيق بطولات؟

تطور بشكل كبير مع توروب، وقادر على تحقيق البطولات، بقى فريق له هجوم قوي، بس محتاج شوية تعديلات في الدفاع، ومنظومة الأهلي الهجومية بقت ممتازة، والدفاع كمان بقى أفضل، الأهلي قادر على حصد البطولات، ورغم صعوبة المنافسة على أفريقيا، لكنه ممكن يوصل لمراحل متقدمة.

ـ من وجهة نظرك إيه احتياجات الأهلي من الصفقات في يناير؟

محتاجين باك شمال ورأس حربة تاني ومساك.

ـ هل الأهلي أخطأ في رحيل وسام أبو علي وعدم توفير بديل بنفس الإمكانيات؟

الأهلي ما أخطأش في رحيل وسام أبو علي، لأنه كان عنده رغبة قوية في الرحيل، ومن الأفضل إنه يمشي، وفكرة البديل الأهلي جاب محمد شريف لكنه مش كان على نفس المستوى لتعويض وسام.

ـ إيه تقييمك لصفقات الأهلي في الصيف الماضي ومن هي أفضل صفقة؟

الصفقات كانت جيدة جداً، وزيزو وبن رمضان وتريزيجيه وبن شرقي كلهم لاعبين مهمين.

ـ رأيك في أداء منتخب مصر وهل هو قادر على التتويج بأمم أفريقيا؟

المباريات الودية مش المقياس الرئيسي، وأنا متفائل وأتمنى التوفيق للمنتخب في البطولة الجاية.

ـ إيه تعليقك على تصريحات حسام حسن بعد مباراة كاب فيردي الودية؟

أرفض تصريحات حسام حسن تماماً، بغض النظر عن أداء المنتخب.

ـ من اللاعب المظلوم في عدم التواجد مع منتخب مصر؟

مش شايف لاعب مظلوم في القائمة الحقيقة.

ـ هل المنافسة في مصر حالياً محصورة بين الأهلي وبيراميدز فقط؟

المنافسة حالياً بين الأهلي وبيراميدز، والزمالك بعيد عن المنافسة.

ـ بمناسبة الزمالك.. هل يقدر يحل مشاكله أم هيواجه نفس مصير الإسماعيلي؟

الزمالك أكبر من كده، وهو فريق كبير وقادر على إيجاد حلول للخروج من الأزمة.

ـ من تتوقع يتوج بالدوري وأفريقيا هذا الموسم؟

التوقع صعب، بس أتوقع الأهلي وبيراميدز يوصلوا لنصف نهائي أفريقيا، والمنافسة على الدوري هتكون بين الأهلي وبيراميدز، والأهلي هو الأقرب للفوز بلقب الدوري.

ـ إيه تقييمك لأداء المنتخبات القومية للشباب الفترة الماضية؟

أداء المنتخبات الوطنية في مراحل الشباب ضعيف جداً.

ـ ليه بعيد عن العمل الإداري أو الفني سواء في الأهلي أو المنتخبات؟

أنا حالياً في مجال الإعلام، وسعيد بالتجربة، ولو جات فرصة للعمل الإداري هرحب بها، لكن لو مفيش، مش هتأثر.